ಮ್ಯಾಗಿ ನೂಡಲ್ಸ್ ನಿಜಕ್ಕೂ ಹಾನಿಕಾರಕವೇ?

ಕೆಲವು ಮ್ಯಾಗಿ ನೂಡಲ್ಸ್ ಸ್ಯಾಂಪಲ್ ಅಲ್ಲಿ ಸೀಸ ಜಾಸ್ತಿ ಇದೆ ಅನ್ನುವ ವರದಿ ನೀವು ಪತ್ರಿಕೆಗಳಲ್ಲಿ ಓದುತ್ತಿರಬಹುದು. ಹಾಗಿದ್ದರೆ ಬೇರೆ ನೂಡಲ್ಸ್ ಉತ್ತಮ ಎಂದು ಅದನ್ನು ತಿನ್ನಲು ಹೊರಟಿದ್ದೀರಾ? ಸ್ವಲ್ಪ ನಿಲ್ಲಿ. ಈ ಬ್ಲಾಗ್ ಲೇಖನ ಓದಿ ಆಮೇಲೆ ಹೊರಡಿ.

ಈಗ ಡೆಲ್ಲಿಯಲ್ಲಿ ಸೀಸ ಜಾಸ್ತಿ ಇದೆ ಅನ್ನುವದು ಗೊತ್ತಾಗಿದ್ದರೆ ಕೇರಳ ಹಾಗೂ ಗೋವಾದಲ್ಲಿ ಸೀಸದ ಸಮಸ್ಯೆ ಇಲ್ಲ. ಹಾಗಿದ್ದರೆ ಇದು ಮ್ಯಾಗಿ ನೂಡಲ್ಸ್ ನ ತಯಾರಿಕಾ ವಿಧಾನದಲ್ಲಿರುವ ದೋಷಕ್ಕಿಂತ ಅದಕ್ಕೆ ಬಳಸುವ ಮೂಲ ಪದಾರ್ಥಗಳಲ್ಲಿನ ಸಮಸ್ಯೆ ಎಂಬುದು ನನ್ನ ಅನಿಸಿಕೆ. ಅದು ನಿಜವಾದಲ್ಲಿ ಬರಿ ಮ್ಯಾಗಿ ಅಷ್ಟೇ ಅಲ್ಲ ಬೇರೆ ನೂಡಲ್ಸ್ ಅಥವಾ ಬೇರೆ ಪ್ರಾಡಕ್ಟ್ ಗಳಲ್ಲೂ ಹಾನಿಕಾರಕ ಪದಾರ್ಥ ಇದ್ದು ನಮ್ಮ ದೇಹಕ್ಕೆ ಸೇರುತ್ತಿರಬಹುದು. ಅಷ್ಟೇ ಯಾಕೆ ಆ ಮೂಲ ಪದಾರ್ಥವನ್ನು ಬೇರೆ ರೂಪದಲ್ಲಿ ನಾವು ತಿನ್ನುತ್ತಿರಬಹುದು.

ಕೈಗಾರಿಕರಣದ ಪ್ರಭಾವದಿಂದ ಇಂದು ಪರಿಸರ ಕಲುಷಿತ ಗೊಂಡು ಯಾವ್ಯಾವ ರಾಸಾಯನಿಕ ನಮ್ಮ ದೇಹ ಸೇರುತ್ತಿದೆಯೋ ದೇವರೇ ಬಲ್ಲ.

ಇಂದು ಸೋಷಿಯಲ್ ನೆಟ್ ವರ್ಕ್ ಜಮಾನಾದಲ್ಲಿ ಈ ವಿಷಯ ಮಿಂಚಿನ ವೇಗದಲ್ಲಿ ಹರಡಿತು. ಎಲ್ಲ ಪತ್ರಿಕೆಗಳಲ್ಲೂ ಸೀಸ (ಲೆಡ್) ದ ಹಾನಿ ಬಗ್ಗೆ ಬರೆದದ್ದೇ ಬರೆದಿದ್ದು. ಬಹುಶಃ ಮ್ಯಾಗಿ ಬ್ರಾಂಡ್ ಗೆ ಈ ಸುದ್ಧಿಯಿಂದ ಆಗಿರುವ ಹಾನಿ ಸರಿಪಡಿಸಲು ನೆಸ್ಲೆ ಅವರು ಹರಸಾಹಸ ಮಾಡಬೇಕೆನೋ. ಈ ಹಿಂದೆ ಕ್ಯಾಡ್ ಬರಿ ಅವರು ಚಾಕಲೇಟುಗಳಿಗೆ ಹುಳಗಳಿಂದ ಬಂದ ಅಪವಾದ ಸರಿಪಡಿಸಿದ ಹಾಗೆ.

ಅಷ್ಟೇ ಅಲ್ಲ ಇಂದು ನಾವು ಪ್ರತಿದಿನ ತಿನ್ನುವ ಧಾನ್ಯ, ತರಕಾರಿ, ಹಣ್ಣು  ಹಾಗೂ ಸೊಪ್ಪುಗಳಲ್ಲೂ ಅವೈಜ್ಞಾನಿಕ ಬಳಕೆಯಿಂದಾಗಿ ಇಂದು ಕ್ರಿಮಿನಾಶಕ ನಮ್ಮ ದೇಹ ಸೇರುತ್ತಿದೆ. ಅದಕ್ಕೆ ನಾವು ಯಾಕೆ ಮೌನರಾಗಿದ್ದೇವೆ? ಕ್ರಿಮಿನಾಶಕ ದೇಹಕ್ಕೆ ಉತ್ತಮ ಎಂದೆ?

ಇಂದು ಅಮೇರಿಕಕ್ಕೆ ಹೋಗುವ ಫಸ್ಟ್ ಗ್ರೇಡ್ ಸಾವಯವ ತರಕಾರಿ, ಹಣ್ಣು ಸಹ ರಾಸಾಯನಿಕ ಸಮಸ್ಯೆಯಿಂದ ವಾಪಸ್ ಬಂದು ಬಿಡುತ್ತದೆ. ಆದರೆ ಭಾರತದಲ್ಲಿ ಬಿಕರಿಯಾಗುವ ಹೆಚ್ಚಿನದು ಸೆಕಂಡ್ ಹಾಗೂ ಥರ್ಡ್ ಗ್ರೇಡ್ ತರಕಾರಿ, ಹಣ್ಣುಗಳು. ಅವುಗಳ ಕಥೆ ಹೇಗಿರಬೇಡ? ಹೆಚ್ಚಿನ ರಾಜ್ಯಗಳು ಮ್ಯಾಗಿ ಸಾಂಪಲ್ ತೆಗೆದುಕೊಂಡು ಪರೀಕ್ಷೆ ಮಾಡಿದ್ದು ಡೆಲ್ಲಿಯಲ್ಲಿ ನಡೆದ ಪರೀಕ್ಷೆಯಲ್ಲಿ ಗೊತ್ತಾದ ಮೇಲೆ. ಅಂದರೆ ಡೆಲ್ಲಿಯಲ್ಲಿ ಯಾವುದಾದರೂ ವಸ್ತು ಸರಿಯಾಗಿದ್ದು ಬೇರೆ ರಾಜ್ಯದಲ್ಲಿ ಸಮಸ್ಯೆ ಇದ್ದರೆ ತಿಳಿಯುತಿತ್ತೇ? ಯಾಕೋ ಅನುಮಾನ.

ವಾಸ್ತವ ಇಷ್ಟೇ ನಾವು ತಿನ್ನುವ ಪ್ರತಿ ಆಹಾರದಲ್ಲಿ ಸತು ಇದ್ದೇ ಇರುತ್ತದೆ. ಇದು ನಾವೇ ಪರಿಸರ ಕಲುಷಿತ ಮಾಡಿಕೊಂಡ ಪರಿಣಾಮ. ಮ್ಯಾಗಿಯ ಕೆಲವು ಸ್ಯಾಂಪಲ್ ಗಳಲ್ಲಿ ಸತು ಜಾಸ್ತಿ ಇರಬಹುದು. ಆದರೆ ಅದೇ ರೀತಿ ಬೇರೆ ಎಲ್ಲ ಪ್ರಾಡಕ್ಟ್ ಗಳು ಅಂದರೆ ಬೇರೆ ನೂಡಲ್ಸ್, ಹಾಲು ಅಷ್ಟೇ ಯಾಕೆ ಇನ್ನಾವುದೇ ತಿನ್ನುವ ಪದಾರ್ಥದಲ್ಲಿ ಅದಕ್ಕಿಂತ ಹೆಚ್ಚು ಸತು ನಾವು ತಿನ್ನುತ್ತಿರಬಹುದು. ಆದರೆ ಅದನ್ನು ಯಾರೂ ಟೆಸ್ಟ್ ಮಾಡುವದಿಲ್ಲ. ಅದು ಸುದ್ದಿ ಆಗದು. ಕೇವಲ ಮಾಧ್ಯಮ ಹಾಗೂ ಸೋಷಿಯಲ್ ನೆಟ್ ವರ್ಕ್ ಗಳ ಹೈಪ್ ಗೆ ಮ್ಯಾಗಿ ಎಂಬ ಬ್ರಾಂಡ್ ಬಲಿ ಆಗಿದೆ ಅಷ್ಟೇ.

ನಾವಿಲ್ಲಿ ಬರಿ ರಾಜಕೀಯ ಮಾಡದೇ ನಾವು ಉಳಿದ ವಸ್ತುಗಳ ರಾಸಾಯನಿಕಗಳ ಬಗ್ಗೆ ಕೂಡಾ ವಿಚಾರ ಮಾಡಬೇಕಿದೆ.ಎಲ್ಲದರ ಪರೀಕ್ಷೆ ಯಾವುದೇ ಬೇಧ ಭಾವ ಇಲ್ಲದೇ ಮಾಡಿ ಬ್ಯಾನ್ ಮಾಡಬೇಕಿದೆ. ಲಂಚ ಕೊಟ್ಟವರನ್ನು ಸುಮ್ಮನೆ ಬಿಟ್ಟು ಉಳಿದವರ ಬಗ್ಗೆ ಕೇಸ್ ಹಾಕುತ್ತಾ ಇದ್ದರೆ ಏನು ಪ್ರಯೋಜನ ಇಲ್ಲ.