Skip to main content

ಅವ{Low}ಕನ

ಬರೆದಿದ್ದುApril 23, 2015
noಅನಿಸಿಕೆ

ಆಟ ಆಡುವ ಸಮಯ ಇರಲಿಲ್ಲ ಗೆಳೆಯರು
ಪಾಟ ಓದುವ ಸಮಯ ಇರಲಿಲ್ಲ ಪುಸ್ತಕ
ಆದರೂ ಏನೇನೊ ಕನಸು.
ಕನಸಲ್ಲಿ ಅರಮನೆ!!
ಅದಕೆ ನಾನೇ ರಾಜ.
ಮುಗ್ಧ ಸಾಮ್ರಾಜ್ಯದಲಿ ಆಳುತ್ತಾ ನಡೆದೆ.
ಕೆಸರುಗದ್ದೆ: ಅದರಲಿಷ್ಟು ಕಪ್ಪೆ ಮರಿ.
ಚಿಲಿಪಿಲಿಯ ಗುಬ್ಬಿ ಗೂಡೆನ್ನ ಮನೆ ಮಾಡಿನಲಿ.
ಸ್ವಚ್ಛ ಸಾಮ್ರಾಜ್ಯದಲಂದು ಭತ್ತದ ಆ ಗದ್ದೆಗಳು!
ಎಂದೂ ಬತ್ತದ ತಿಳಿ ಒಸರು ಎಲ್ಲೆಲ್ಲು.
ಬಾಲ್ಯ ಕಳೆದಾಗೊಮ್ಮೆ
ಮೀಸೆ ಚಿಗುರಿದ ಹೆಮ್ಮೆ
ಆದರೂ ಈ ಸಾಮ್ರಾಜ್ಯದ ಅತಿ ಮುಗ್ಧ ನಾನೆಂಬ ಅರಿವಿರದೆ ಆಳಿದೆ.
ಕೋಟೆ ಕೊತ್ತಲ ಕಟ್ಟಿ
ಮದ್ದಾನೆಗಳ ಮೆಟ್ಟಿ
ಒಡಲೊಳಗೇ ಗೂಡುಕಟ್ಟಿ
ಭವ್ಯ ಭಾರತವೆಂಬ ಮೊಟ್ಟೆ ಇಟ್ಟೆ
ಜನಗಣಮನದ ಗೀತೆಯಲೆ ಕಾವು ಕೊಟ್ಟೆ
ಮರಿಗಳಾಗಲೆ ಇಲ್ಲ!
ಮೊಟ್ಟೆ ಬಿರಿಯಲೇ ಇಲ್ಲ!! ಗೂಡಿಂದ ಹೊರಬಂದು
ಸುತ್ತ 'ಅವಲೋಕಿಸಿದೆ
ಎಲ್ಲಿ ಒಸರು?
ಎಲ್ಲಿ ಗದ್ದೆ?
ಕೆಸರಿದ್ದರಲ್ಲವೆ ಒಸರು?!
ಎಂದೂ ಬತ್ತದ ಗದ್ದೆ
ಬತ್ತಿ ಒಣಗಿದೆ ಇಲ್ಲಿ
ಕಂಗು ರಬ್ಬರು ಗುಂಡಿ,
ಕಾಸು ಅರಳುವ ಮರಗಳು!!
ನಾಶವಾಗಿದೆ ಕಾಡು
ಒಣಗಿ ಹೋಗಿದೆ ತೋಡು
ಮತ್ತೆ ಕನಸಲಿ ಜಾರುತ್ತ
ತೆವಲುತ್ತಾ ಮುನ್ನಡೆದೆ
ವಯಮಾನ ಜಾರಿತ್ತು
ಕಣ್ಣು ಮಂಜಾಗಿತ್ತು
ದೈತ್ಯ ಚೇತನ ಕುಂದಿ, ಕೈಗೆ ಊರುಗೋಲು ಬಂದಿತ್ತು.
ಮತ್ತೆ ರಸ್ತಯ ಉದ್ದಕ್ಕು ಹುಡುಕಿದೆ.
ಎಲ್ಲಿ ನನ್ನ ಆ ಮೊಟ್ಟೆ?
ನಾನೆಲ್ಲಿ ಮರೆತಿಟ್ಟೆ!?
ಎಲ್ಲಿ ಸುಂದರ ಮರಿ?
ಎಲ್ಲಿ ಕನಸಿನ ಭಾರತ?
ಇದು ಕಾಸಿನ ಭಾರತ!!?
ಏನೂ ಕಾಣದು!
ಏನೂ ಕೇಳದು!!
ಮರೆತು ಎಲ್ಲೋ ಇಟ್ಟ ಕನ್ನಡಕ,
ಕನಸಿನಷ್ಟೇ ನಿಗೂಢ

ಲೇಖಕರು

JAYARAM NAVAGRAMA

ಮ್ಯಾಂವ್sss

ನಾನು ಮೂಡಬಿದ್ರಿ ಸಮೀಪದ ಪುಚ್ಚಮೊಗರಿನಲ್ಲಿ 1966 ರಿಂದ 1968 ಈ ಇಸವಿಯ ಮಧ್ಯೆ ಜನಿಸಿರುವ ಬಗ್ಗೆ ದಟ್ಟ ವದಂತಿ ಇದೆ!
ನನ್ನ ತಂದೆ ಮತ್ತು ತಾಯಿ ಇಬ್ಬರೂ ಬಿಲ್ಲವರು.
ನನಗೆ ಈಗ ಸುಮಾರು 48 ವರ್ಷ ಆಗಿರಬಹುದು.
ಒಂದನೇ ತರಗತಿಯಿಂದ 7ನೇ ತರಗತಿ ತನಕ ನಮ್ಮ ಪುಚ್ಚಮೊಗರು ಗ್ರಾಮದ ನಿತ್ಯಾನಂದ ಎಯ್ಡೆಡ್ ಎಲಿಮೆಂಟರಿ ಶಾಲೆ
8 ಮತ್ತು 9ನೇ ತರಗತಿಯನ್ನು ಸರಕಾರಿ ಪ್ರೌಢಶಾಲೆ ಕೊನ್ನೆಪದವು. ಇಲ್ಲಿ ಕಲಿತೆನು.
ನಾನು ಎಂಟನೇ ತರಗತಿಯಲ್ಲಿರುವಾಗ ಶ್ರೀಮತಿ ಇಂದಿರಾ ಗಾಂಧಿಯವರ ಕೊಲೆ ಆಯಿತು. ಆಗ ಚಿತ್ರದುರ್ಗದ ಸುಜಾತ ಟೀಚರ್ ಬಾಯ್ತುಂಬಾ ಅತ್ತಿದ್ದರು.
ಹತ್ತು ವರುಷಗಳ ಕೆಳಗೆ ನನ್ನ ಊರನ್ನು ತ್ಯಜಿಸಿ
ಸತಿಸುತರ ಪ್ರೀತ್ಯರ್ಥಂ ನವಗ್ರಾಮಾಗಮನ ಮಾಡಿ
ನಾಯಿಯಂತೆ ವರ್ಕ್ ಮಾಡುತ್ತಾ ಜಾಯಿಂಟ್ ಪೆಯಿನ್ ಬ್ಯಾಕ್ ಪೆಯಿನ್ ಸ್ಕಿನ್ ಪ್ರಾಬ್ಲೆಮ್ ಇತ್ಯಾದಿ ಪ್ರಶಸ್ತಿ ಪಡೆಯುತ್ತಾ
ಫೇಸ್ಬುಕ್ ವಿಸ್ಮಯನಗರಿ ಗಳಲ್ಲಿ ಮಿಂಚುತ್ತಾ ಅಥವಾ ಹಾಗೆಂದು ಭ್ರಮಿಸುತ್ತಾ!
ಶ್ರೀಯುತ ಮೋಧೀಜಿಯವರ ಆಡಳಿತ ವೈಖರಿ ಏನೆಂದು ಅರಿಯಲಾರದೆ ಅರ್ಥೈಸಲಾರದೆ ಅಚ್ಚರಿಯಿಂದ ಮೂಗಿನ ಮೇಲೆ ಬೆರಳಿಟ್ಟುಕೊಂಡು ...
ತುಂಬಾ ದಿನದಿಂದ ಆಲೋಚಿಸುತ್ತಾ ಇರುವ ಕನ್ನಡದ ಕಂದ ನಾನು.

ಈ ಲೇಖನದ ಬಗ್ಗೆ ನಿಮ್ಮ ಅನಿಸಿಕೆ ತಿಳಿಸಿ

The content of this field is kept private and will not be shown publicly.