ಅಮ್ಮಾ ನೀ ಕ್ಶಮಿಸಿಬಿಡು

     ಮತ್ತೊಮ್ಮೆ ಮಗದೊಮ್ಮೆ ನೀನೆನಗೆ ನೆನಪಾದೆ,

     ಮೊದಲ ವೇತನದ ದಿನ , ವಧುವಾಗಿ ಹೊರಟ ಕ್ಶಣ

    ಹೆರಿಗೆನೋವಲಿ ,ಪುಟ್ಟ ಹಸುಕಂದ ಅಳುತಿರಲು

    ಮತ್ತೆ ಬಾಣಂತನದಿ ನಿದ್ದೆ ಇರದಿಹ ರಾತ್ರಿ

    ವಾತ್ಸಲ್ಯದೊರತೆ ನೀನಿಲ್ಲದಿರುವುದೇ ಕೊರತೆ.

    ನನಗೂ ಹಾಡಿರಬಹುದು ನೀ ಮಧುರ ಜೊಗುಳವ

   ನಿದ್ದೆಗೆಟ್ಟಿರಬಹುದು , ಊಟ ಬಿಟ್ಟಿರಬಹುದು

   ತಲೆದಡವಿ ಕಣ್ಣೊರಸಿ ಮುದ್ದು ಮಾಡಿರಬಹುದು.

   ತಲೆಬಾಚಿ ಸಿಂಗರಿಸಿ  ಚೆಂದ ನೋಡಿರಬಹುದು.

   ಎಲ್ಲಿರುವೆ ಅಲ್ಲಿಂದ ಮನ ತುಂಬಿ ಹರಸಿಬಿಡು

   ಎದೆಗೊತ್ತಿಕೊಂಡೆನ್ನ ಹಣೆಗೆ ಹೂಮುತ್ತನಿಡು

  ತಿಳಿದೋ ತಿಳಿಯದೇ ಗೆಯ್ದ ನೂರು ಅಪರಾಧವನೂ

  ತಾಯಿಯಲ್ಲವೇ ನೀನು, ಕ್ಶಮಿಸಿಬಿಡು ಎಲ್ಲವನೂ...