ಅಹಹಾ! ಏನು ವಿಸ್ಮಯ! ಎಂಥಾ ವಿಸ್ಮಯ!!

[img_assist|nid=22065|title=ವಿಸ್ಮಯ ಬಳಗ|desc=|link=node|align=left|width=98|height=130]ಸನ್ ಎರಡು ಸಾವಿರದ ಹನ್ನೊಂದನೇ ಇಸ್ವಿಯ ಮೇ ಹದಿನಾಲ್ಕು ಶನಿವಾರ ಮಧ್ಯಾಹ್ನ ಎರಡು ಘಂಟೆಗೆ ಒದಗಿದ ಶುಭಲಗ್ನದಲ್ಲಿ ನಡೆದ ಘಟನೆಯು ಕರ್ನಾಟಕದ ಚರಿತ್ರೆಯ ಪುಟಗಳಲ್ಲಿ ಸುವರ್ಣಾಕ್ಷರಗಳಲ್ಲಿ ಬರೆದಿಡುವಂತಹದ್ದೇನೂ ಅಲ್ಲದಿದ್ದರೂ ತೆಗೆದು ಹಾಕುವಂತದ್ದೂ ಅಲ್ಲ ಬಿಡಿ.
ಅಂದು ಬಸವನಗುಡಿಯಲ್ಲಿರುವ ಕಹಳೆ ಬಂಡೆಯ ಉದ್ಯಾನವನದ ಮೃತ್ತಿಕೆಯು ಕನ್ನಡಗರಡಿಯಾಳುಗಳ ಪಾದಸ್ಪರ್ಶದಿಂದ ಪುಳಕಿತವಾಯಿತು.
ಅಲ್ಲೇ ಶಿಲಾರೂಪದಲ್ಲಿ ನೆಲಸಿರುವ ಡಿ.ವಿ.ಗುಂಡಪ್ಪನವರ ಪ್ರತಿಮೆಯ ಕಣ್ಣಿನಿಂದ ಆನಂದಾಶ್ರುಗಳು ಹೊಮ್ಮಿದವೂ, ಅದನ್ನು ಅವರು ಕನ್ನಡಕ ತೆಗೆದು ತಮ್ಮ ಹೆಗಲಿನಲ್ಲಿದ್ದ ಅಂಗವಸ್ತ್ರದಿಂದ ಒರೆಸಿಕೊಂಡರೂ ಎಂದು ಪ್ರತ್ಯಕ್ಷದರ್ಶಿಗಳ ಅಂಬೋಣ.
ವಿಸ್ಮಯನಗರಿಯ ನಿರ್ಮಾತೃ ರಾಜೇಶ್ ಹೆಗಡೆ, ಕೆ ಎಸ್ ಶಿವಕುಮಾರ್, ಉಮಾಶಂಕರ್, ಕೆಎಲ್ಕೆ, ವಿ ಎಂ ಶ್ರೀನಿವಾಸ್ ಇವರೆಲ್ಲರ ಜೊತೆಯಲ್ಲಿ ನಾನೂ ಸೇರಿಕೊಂಡು ಕನ್ನಡ, ನಾಡು, ನುಡಿಯ ಬಗ್ಗೆ ಚರ್ಚಿಸಿದ ಘಳಿಗೆ ಅವಿಸ್ಮರಣೀಯ.ಅಲ್ಲಿಯವರೆಗೆ ಇವರೆಲ್ಲರನ್ನೂ ಫೋಟೋಗಳಲ್ಲಿ ಕಂಡಿದ್ದ ನಾನು ಕಣ್ಣಾರೆ ಕಂಡು ಕಣ್ತುಂಬಿಸಿಕೊಂಡಿದ್ದಂತೂ ನಿಜ.ಎಲ್ಲರೂ ನನ್ನ ಕಲ್ಪನೆಗೆ ವ್ಯತಿರಿಕ್ತವಾಗಿದ್ದರು.ಉದಾಹರಣೆಗೆ ಇಪ್ಪತ್ತನಾಲ್ಕೂವರೆ ಹರೆಯದ ತರುಣ ಕೆ ಎಲ್ಕೆ ಅವರನ್ನ ನಿರೀಕ್ಷಿಸುತ್ತಿದ್ದ ನನ್ನ ಬಳಿ ಅರೆನರೆತ ಕೂದಲಿನ ಕನ್ನಡಕಧಾರಿ ವ್ಯಕ್ತಿಯೊಬ್ಬರು ಬಂದು ಸಗೋತ್ರ ಸಮೇತ ಪರಿಚಯಿಸಿಕೊಂಡರು ಹಾಗೂ ಅವರ ಹೆಸರೂ ಸಹ ಕೆ ಎಲ್ಕೆ ಎಂಬುದು ಕಾಕತಾಳೀಯವಲ್ಲವಷ್ಟೇ!
ಶಾರೂಖ್ ಖಾನ್ ಹಾಗೇ ಕಟ್ಟುಮಸ್ತಾಗಿದ್ದ ವ್ಯಕ್ತಿಯೊಬ್ಬನನ್ನು ನೋಡಿ ಬಹುಶಃ ಪಾರ್ಕಿಗೆ ಬಂದು ಯಾವುದೋ ಹುಡುಗಿಗೆ ಕಾಯುತ್ತಿರಬೇಕೆಂದು
ಊಹಿಸಿದ್ದು ಸುಳ್ಳಾಯಿತು. ಯಾಕೆಂದರೆ ಅವರ ಹೆಸರು ಕೆ ಎಸ್ ಶಿವಕುಮಾರ್. ಹೀಗೆ ಬಿಂಕ ಬಿಗುಮಾನಗಳಿಲ್ಲದ ಸಾಫ್ಟ್ ವೇರ್ ಇಂಜಿನಿಯರ್ ರಾಜೇಶ್ ಹೆಗಡೆ, ಮದುಮಗನ ಕಳೆಯನ್ನು ಆಭರಣದಂತೆ ಧರಿಸಿದ್ದ ಶ್ರೀನಿವಾಸ್ ನಗೆಯ ಫ್ಲಾಶ್ ಲೈಟಿನಿಂದ ಕಣ್ಣನ್ನು ಕೋರೈಸುತ್ತಿದ್ದ ,ತಮ್ಮ ಅಟ್ಟಹಾಸದಿಂದ ಉದ್ಯಾನವನದ ಖಗಮಿಗಗಳನ್ನು ಕಂಗಾಲಾಗಿಸುತ್ತಿದ್ದ ಉಮಾಶಂಕರ್....... ಅಬ್ಭಾ, ಮರೆತೇನಂದರ ಮರೆಯಲಿ ಹ್ಯಾಂಗ!
 ಅಂದು ನಮ್ಮ ನಡುವೆ ನಡೆದ ಚರ್ಚೆಯಲ್ಲಿ ಕೆಲವು ತುಣುಕುಗಳು
 * ಡಬ್ಬಿಂಗ್ ಎನ್ನುವುದು ಕನ್ನಡಿಗರಿಗೆ ಅತೀ ಅವಶ್ಯಕ. ಅದರಿಂದಲೇ ಕನ್ನಡಿಗರ ನಿಜವಾದ ಪ್ರತಿಭೆ ಹೊರಬರಲು ಸಾಧ್ಯ ( ಕೆ ಎಸ್ ಉವಾಚ)
*ನಮ್ಮಲ್ಯಾಕ್ರೀ ಸಿನಿಮಾ ಎಂಬ ಕಲೆಯನ್ನು ಇನ್ನೂ ಶೋಕಿಯೆಂದೇ ಕನ್ಸಿಡರಿಸುತ್ತಾರೆ?, ತೆಲಗು ತಮಿಳಿನಂತೆ ಅದು ಲೈಫ್ ಸ್ಟೈಲ್ ಆಗುವುದು
ಯಾವಾಗ? ( ಕೆ ಎಲ್ಕೆ ಅಣಿಮುತ್ತು )
*ವಿಸ್ಮಯ ನಗರಿ ಕೇವಲ ಸಾಹಿತ್ಯಕ್ಕಾಗಿ ಅಲ್ಲ. ಸಾಹಿತ್ಯದ ಹೊರತಾಗಿಯೂ ಇರುವ ತಂತ್ರಜ್ಜಾನ, ಮಾಹಿತಿ ಮುಂತಾದವುಗಳನ್ನು ಕನ್ನಡದಲ್ಲೇ
ಪ್ರಚರಿಸುವುದು ವಿಸ್ಮಯದ ಗುರಿ ( ರಾಜೇಶ್ ಹೆಗಡೆಯವರ ಧ್ಯೇಯ ವಾಕ್ಯ )
*ವಿಸ್ಮಯಕ್ಕಾಗಿ ಕಟ್ಟುವೆವು ನಾವು ಹೊಸ ನಾಡೊಂದನ್ನು, ಹೊಸ ಬೀಡೊಂದನು ( ಶ್ರೀನಿವಾಸ್ ಮತ್ತು ಉಮಾಶಂಕರ್ ಸೇರಿ ಹಾಡಿದ ಕ್ರಾಂತಿ ಗೀತೆ )
* ಹೌದು ಹೌದು ಅದೇ ಸರಿ ( ನಾನು)
* ಕೊನೆಯದಾಗಿ ವಿಸ್ಮಯದಲ್ಲಿ ತರಬೇಕಾದ ಬದಲಾವಣೆಗಳ ಕುರಿತು ಉಮಾಶಂಕರ ಅವರು ರಚಿಸಿದ್ದ ಮೂರುವರೆ ಅಡಿಯ ಸಣ್ಣ ಪಟ್ಟಿಯನ್ನು ಸಾಮೂಹಿಕವಾಗಿ ವಾಚಿಸಲಾಯಿತು.
ಇವೇ ಮೊದಲಾದ ಸಾಂಸ್ಕ್ರತಿಕ ಕಾರ್ಯಕ್ರಮಗಳೊಂದಿಗೆ ಅಂದಿನ ಸಮಾವೇಶ ನಭೂತೋ ನಭವಶ್ಯತಿ ಎಂಬಂತೆ ಯಶಸ್ವಿಯಾಯಿತು. ನಮ್ಮ ಕನ್ನಡ ಪರ ಕಾಳಜಿ ನೋಡಿ ತಾಯಿ ಭುವನೇಶ್ವರಿಯು ಸುರಿಸಿದ ಕಣ್ಣೀರು ನಮ್ಮೆಲ್ಲರನ್ನೂ ಮಳೆಯ ರೂಪದಲ್ಲಿ ತೋಯಿಸಿದ್ದು ಅಂದಿನ ಹೈಲೈಟ್.
 (ಕೊನೆಯದಾಗಿ ನಮ್ಮೆಲ್ಲರ ಕನ್ನಡ ಚಟುವಟಿಕೆಗಳನ್ನು ಕದ್ದು ನೋಡುತ್ತಿದ್ದ ಶ್ರೀಯುತ ಹೆಚ್ ಡಿ ರೇವಣ್ಣನವರು,ಕನ್ನಡಿಗರ ಶ್ರೇಯೊಭಿಲಾಷೆಗಳನ್ನು
ಸಹಿಸಲಾಗದೇ ತತ್ ಕ್ಷಣವೇ ಮಲೆಯಾಳಿ ಮಾಂತ್ರಿಕರನ್ನು ಸಂಪರ್ಕಿಸಿ, ಇವರೆಲ್ಲರ ಪ್ರತಿಜ್ನೆಯು ನಿಜವಾಗದೇ ಹೋಗಲಿ, ಇವರ ಕನ್ನಡ
ಪ್ರೇಮವು ಇಂದಿನಿಂದ ಸರಿಯಾಗಿ ಒಂದು ವರುಷದವರೆಗೂ ತಾತ್ಕಾಲಿಕ ವಿಸ್ಮರಣೆಯುಂಟಾಗಲಿ,ಇವರು ಕನ್ನಡದ ಪರವಾಗಿ ಕೈಗೊಂಡ ಯಾವುದೇ ಕೆಲಸವು ಅಪೂರ್ಣವಾಗಲಿ.....ಇವೇ ಮುಂತಾದ ಫಲಗಳುಂಟಾಗುವಂತೆ ಮಾಟ ಮಾಡಿಸಿದರು ಎಂಬಲ್ಲಿಗೆ......!)