ನನ್ನ ಕವಿತೆಗೆ
ನನ್ನ ಕವಿತೆಗೆ
ಹೊಸತನದ ಹುರುಪಿಲ್ಲ, ಹಳೆತನದ ನೆನಪಿಲ್ಲ,
ತನ್ನತನದ ಹೊಳಪಿಗೆ ಕೊರತೆಯಿಲ್ಲ......!!
ಭಾವನೆಗಳ ಬಂಧವಿಲ್ಲ, ಕಾಮನೆಗಳ ಅಂದವಿಲ್ಲ
ಮನುಜನ ಕಾಮ ಕ್ರೋಧಗಳ ಗಂಧವಿಲ್ಲ.....!!
ನನ್ನ ಕವಿತೆಯು
ಗೋಳಿನ ಕಥೆಯಲ್ಲ, ವಿರಹದ ವ್ಯಥೆಯಲ್ಲ ,
ಇತಿಹಾಸದಲಿ ವಿಜೃಂಭಿಸುವ ಸಾಹಸಗಾಥೆಯೂ ಅಲ್ಲ....!!
ಭರವಸೆಯ ಬೆಳಕಲ್ಲ, ದುರಾಸೆಯ ಕೊಳಕಲ್ಲ
ಬರೀ ಪ್ರಕೃತಿ -ಕೃತಿಯ ಪುಳಕಗಳು......!!
ನನ್ನ ಕವಿತೆ
ಹಾಡಾಗಲೊಲ್ಲದು , ಪಾಡಾಗಲೊಲ್ಲದು,
ಪುಸ್ತಕದಲಿ ಅಚ್ಚಾಗಲೊಲ್ಲದು.......!!
ಈ ಸೋಮಾರಿಗೆ ಪಲ್ಲವಿಯಿಲ್ಲ, ಚರಣಗಳಿಲ್ಲ,
ಪ್ರಾಸಗಳ ಅಲಂಕಾರವಿಲ್ಲ, ಛಂಧಸ್ಸಿನ ಅಹಂಕಾರವಿಲ್ಲ....!!
ನನ್ನ ಕವಿತೆಗೆ
ಕ್ರಾಂತಿಯ ಸೋಗಿಲ್ಲ, ಶಾಂತಿಯ ನೊಗವಿಲ್ಲ,
ತೃಪ್ತಿಯ ಭೋಗಕ್ಕೆ ಎಲ್ಲೆಯಿಲ್ಲ......!!
ಗೆಲ್ಲುವ ಶಕ್ತಿಯಿಲ್ಲ, ಸೋಲಿಸುವ ಯುಕ್ತಿಯಿಲ್ಲ,
ತನ್ನನು ತಾನೇ ಪ್ರೀತಿಸುವ ಭಕ್ತಿಯೇ ಎಲ್ಲ......!!
ನನ್ನ ಕವಿತೆಗೆ
ದುಖದ ದುಮ್ಮಾನವು ಬೇಡ, ಸುಖದ ಸನ್ಮಾನವು ಬೇಡ,
ಸುಖ -ದುಖಗಳೊಡನೆ ಸಾಗುವ ಬದುಕಿನ ಆತ್ಮಾಭಿಮಾನವೊಂದೆ ಸಾಕು..!!
ಈ ಕವಿತೆಗೆ ಅರ್ಥವೂ ಇಲ್ಲ, ಅನರ್ಥವೂ ಇಲ್ಲ...
ಜಗವೆಲ್ಲ ತನ್ನನ್ನು ಹೊಗಳಲಿ ಎಂಬ ಸ್ವಾರ್ಥವು ಮೊದಲೇ ಇಲ್ಲ..........!!!
:-ವಿಶ್ವನುಡಿ
ಸಾಲುಗಳು
- 712 views
ಲೇಖಕರು
ಮೂಲತಃ ಗಂಡು ಮೆಟ್ಟಿದ ನಾಡು ಬೆಳಗಾವಿ ಜಿಲ್ಲೆಯ ಹುಕ್ಕೆರಿಯವನು, ಸಧ್ಯ ಐಟಿ ಮೆತ್ತಿದ ಬೆಂಗಳೂರಿನ ಮಾಹಿತಿ ತಂತ್ರಜ್ಞಾನ ಸಂಸ್ಥೆಯೊಂದರಲ್ಲಿ ಅಭಿಯಂತರನಾಗಿ ಕೆಲಸ ಮಾಡುತ್ತಿದ್ದೇನೆ, ಚಿಕ್ಕಂದಿನಿಂದ ಮಾತೆ ಮಾತೃಭೂಮಿ ಮಾತೃಭಾಷೆಯ ಮೇಲೆ ಅತಿಯಾದ ಅಭಿಮಾನ, ಗೌರವ. ನಾನು ಬೇರೆಯವರಿಗೋಸ್ಕರ ಬರೆಯುವುದಿಲ್ಲ , ನಾನು ನನಗಾಗಿ ಬರೆಯುತ್ತೇನೆ. ನನ್ನಲ್ಲಿ ಉದ್ಭವಿಸುವ ಪ್ರಶ್ನೆಗಳು ಕಾಗದದ ಮೇಲೆ ಚಿತ್ರಿಸುತ್ತೇನೆ. "ಮೌನ" ನನ್ನನ್ನು ಅತಿಯಾಗಿ ಕಾಡಿದ, ಕಾಡುತ್ತಿರುವ ಪ್ರಶ್ನೆ.....
ನಾನು ಬಹಳಷ್ಟು ಓದುತ್ತೇನೆ. ಭೈರಪ್ಪ, ಗಣೇಶಯ್ಯ , ವಸುಧೇಂದ್ರ , ತೇಜಸ್ವಿ ಕಾದಂಬರಿಗಳು ; ಪ್ರತಾಪ್ ಸಿಂಹ, ವಿಶ್ವೇಶ್ವರ ಭಟ್ , ಚಕ್ರವರ್ತಿ ಸೂಲಿಬೇಲೆಯವರ ಅಂಕಣಗಳನ್ನು ಓದುವುದು ಖುಷಿ ಕೊಡುತ್ತದೆ. ಛಾಯಾಚಿತ್ರಗಳನ್ನು ಸೆರೆ ಹಿಡಿಯುವುದು ನನ್ನ ಮತ್ತೊಂದು ಹವ್ಯಾಸ. ಆದರೆ ಇನ್ನು ಪಳಗಬೇಕಿದೆ.
ಈ ಲೇಖನದ ಬಗ್ಗೆ ನಿಮ್ಮ ಅನಿಸಿಕೆ ತಿಳಿಸಿ