ಸಾಗರದೆಲ್ಲ ಅಲೆಗಳು ದಡವ ತಲುಪುವುದಿಲ್ಲ...

ಸಾಗರದೆಲ್ಲ ಅಲೆಗಳು ದಡವ ತಲುಪುವುದಿಲ್ಲ,
ಹೃದಯದೆಲ್ಲ ಮಿಡಿತಗಳು ಮನವ ತಾಕುವುದಿಲ್ಲ!
ಕಂಡ ಕಣ್ಣಿನೆಲ್ಲ ಬಿಂಬಗಳು ಎದೆಗಿಳಿಯುವುದಿಲ್ಲತಲುಪಿದ್ದಕ್ಕಿಂತ ತಲುಪದಿದ್ದಕ್ಕೇ ತಪನೆ
ತಾಕದಿದ್ದನ್ನೂ ಕಳೆದುಕೊಂಡ ಬೇನೆ
ಎದೆಗಿಳಿಯದುದಕೆ ಎದೆಯುರಿ-ಸೋನೆ
ದಡವ ತಲುಪದಲೆಯ ನುಂಗಿ ನೊಣೆದ
ಅದರ ಹಿಂದಿನಲೆಯದೇನೂ ಹೆಚ್ಚಲಿಲ್ಲ ಗಮನ -
ಸಣ್ಣಲೆಯ ನುಂಗಿದುದಕೆ ಶಾಪವದಕೆ-ದಡ ಮುಟ್ಟಿ
ಅಂದುಕೊಂಡಷ್ಟೂ ದೂರ ತಲುಪದೇ ಅದರ ಶಕ್ತಿ ಪತನ!
ಸಿಕ್ಕಿದ್ದನ್ನೂ ಸಿಗಲಾರದುದರ ನೋವಿನಲಿ ದೂರ ಸರಿಸಿ,
ದೊರೆಯದುದಕೆ ಈ ತಪವೆಂದು ಕುಳಿತು ಭ್ರಮಿಸಿ,
ಎಂದಾದರೂ ಸಿಕ್ಕಬಹುದೆಂದು ಕನಸಿ, ಸಂಭ್ರಮಿಸಿ
ಎಲ್ಲವೂ ಕಳೆದು, ಎಲ್ಲವೂ ಮಿಥ್ಯವೆನಿಸುವಾಗ
ನೆನಪಾಗುವುದು ಕವಿವಾಣಿ - 'ಇರುವುದೆಲ್ಲವ ಬಿಟ್ಟು...'
ಈಗ ನನಗೆ ನನ್ನದೇ ಸಾಂತ್ವನ -
ಇಲ್ಲ, ನಾನು ತಪ್ಪಾದುದನ್ನೇನೂ ಮಾಡಿಲ್ಲ!