ಕಾವೇರಿ ನಿಸರ್ಗ ಧಾಮ - ನಿಸರ್ಗದ ಮಡಿಲು - ಚಿತ್ರ ಸಮೇತ

ಕೊಡಗಿನ ಕಾವೇರಿ ತೀರದಲ್ಲಿರುವ ಸುಂದರ ಪ್ರವಾಸಿ ತಾಣವೇ ಕಾವೇರಿ ನಿಸರ್ಗಧಾಮ. ಇಲ್ಲಿ ಆನೆ ಸವಾರಿ, ಬೋಟಿಂಗ್, ದೋಣಿ ವಿಹಾರ ಮತ್ತು ಜಿಂಕೆ ಎಲ್ಲ ಇದೆ. ಆನೆ ಸವಾರಿ, ಬೋಟಿಂಗ್ ಮಾಡುವ ಇಚ್ಚೆ ಇದ್ದರೆ ಪ್ರವೇಶ ಟಿಕೆಟ್ ತೆಗೆದುಕೊಳ್ಳುವಾಗಲೇ ಖರೀದಿಸಿದರೆ ಒಳ್ಳೆಯದು. ಇಲ್ಲದಿದ್ದರೆ ಮತ್ತೆ ವಾಪಸ್ ಬಂದು ಖರೀದಿಸಬೇಕಾಗುತ್ತದೆ.
ಟಿಕೆಟ್ ತೆಗೆದುಕೊಂಡು ದೊಡ್ಡ ಪ್ರವೇಶ ದ್ವಾರ ದಾಟಿದ ನಂತರ ನಮಗೆ ಸಿಕ್ಕಿದ್ದು ತೂಗು ಸೇತುವೆ. ತೂಗು ಸೇತುವೆ ದಾಟಿ ಬಲಕ್ಕೆ ತಿರುಗಿ ಕೆಳಕ್ಕಿಳಿದರೆ ಅಲ್ಲಿ ಬೋಟಿಂಗ್ , ದೋಣಿ ವಿಹಾರ ನಡೆಯುತ್ತಿತ್ತು. ನಮ್ಮ ಸರದಿ ಕಾದು ಪೆಡಲ್ ಬೋಟಿಂಗ್ ಸಿಕ್ಕಾಗ ಸ್ವರ್ಗಕ್ಕೆ ಮೂರೇ ಗೇಣು. ಯಾರೂ ನೀರಲ್ಲಿ ಕೈ ಹಾಕಬೇಡಿ ಮೊಸಳೆ ಇರಬಹುದು ಎಂದು ಪ್ರವಾಸಿಗರನ್ನು ದೋಣಿಯವರು ಎಚ್ಚರಿಸುತ್ತಿದ್ದರು.

ಒಂದು ಹದಿನೈದು ನಿಮಿಷ ಬೋಟಿಂಗ್ ಮಾಡಿ ಆನೆ, ಜಿಂಕೆ ಇರುವ ಕಡೆ ಹೊರಟೆವು. ಜಿಂಕೆಯನ್ನು ಇಲ್ಲಿ ಹತ್ತಿರದಿಂದ ಮುಟ್ಟಿ ನೋಡಬಹುದು. ಹೆಚ್ಚು ಕಡಿಮೆ ಆಕಳ ಕರು ಮುಟ್ಟಿದ ಅನುಭವ! ಜಿಂಕೆಗಳಿಗೆ ಎಲೆಕೋಸನ್ನು ಖರೀದಿಸಿ ತಿನ್ನಲು ಕೊಟ್ಟೆವು. ಅದನ್ನು ತಿನ್ನಲು ಜಿಂಕೆಗಳ ನಡುವೆಯೇ ಸ್ಪರ್ಧೆ ಏರ್ಪಟ್ಟಿತ್ತು.

ಆ ದಿನ ಆನೆ ಸವಾರಿಯ ಟಿಕೆಟ್ ನಾವು ತೆಗೆದುಕೊಳ್ಳಲಿಲ್ಲ. ದೂರದಿಂದಲೇ ಆನೆ ಸವಾರಿ ಮಾಡುತ್ತಿದ್ದ ಬೇರೆಯವರನ್ನು ವೀಕ್ಷಿಸಿ ವಾಪಸ್ ಹೊರಟೆವು. ನಿಸರ್ಗ ಧಾಮದ ಒಳಗೆ ಅಂಗಡಿಗಳಿದ್ದು ಕೂಲ್ ಡ್ರಿಂಕ್ಸ್, ಐಸ್ ಕ್ರೀಮ್ ಮೊದಲಾದವು ಸಿಗುತ್ತವೆ.
ಅಲಂಕಾರಿಕ ವಸ್ತುಗಳು ಸಿಗುತ್ತವೆ. ಆದರೆ ಬೆಲೆ ದುಬಾರಿ.

ನಿಸರ್ಗ ಧಾಮದ ಹೆಬ್ಬಾಗಿಲು

ನಿಸರ್ಗ ಧಾಮದ ತೂಗು ಸೇತುವೆ

ನಿಸರ್ಗಧಾಮ ದೋಣಿ ವಿಹಾರ

ಪೆಡಲ್ ಬೋಟಿಂಗ್

ನಿಸರ್ಗ ಧಾಮ ಜಿಂಕೆಗಳು

ನಿಸರ್ಗ ಧಾಮ ಆನೆ ಸವಾರಿ