ಅವರ ಹೆಸರೇ (ಭೈ)ಬೈರಪ್ಪ; ಬಯ್ಯದಿದ್ರೆ ಹ್ಯಾಂಗಪ್ಪ?

ಡಾನಮ್ಮ ಶ್ರೀಮಂತ ಇಂಡಿಯಾ ಹಾಗು ಬಡ ಭಾರತದಲ್ಲಿ ಜಾತ್ಯತೀತರೆನ್ನಿಸಿಕೊಳ್ಳಲು ಅಫ್ಜಲ್ ಗುರುವನ್ನು ಗಲ್ಲಿಗೆರಿಸುವದನ್ನು ವಿರೋಧಿಸಿ, ಮುಂಬೈ ದಾಳಿಯನ್ನು ಮಾಮೂಲಿ ವಿಷಯವೆಂದು ತಳ್ಳಿ ಹಾಕಿದರಾಯಿತು. ಅದೇರೀತಿ, ರೆಡ್ಡಿಗಳ ಶ್ರೀಮಂತ ಹಾಗೂ ಕನ್ನಡಿಗರ ಬಡ ಕರ್ನಾಟಕದಲ್ಲಿ ನಿಮಗೆ 'ಬುಧ್ಧಿಜೀವಿ' ಎನ್ನಿಸಿಕೊಳ್ಳಬೇಕೆ -ಹಾಗಾದರೆ ನೀವು ಭೈರಪ್ಪನವರನ್ನು ಬೈದರೆ ಸಾಕು.

ಯಾರೋ ಕೇಳಿದ್ದರು, " ಸ್ವಾಮಿ, ಭೈರಪ್ಪನವರನ್ನೇಕೆ ಬಯ್ಯುತ್ತೀರಿ, ಅವರ ಕೃತಿಯಲ್ಲಿಯ ವಿಷಯಗಳನ್ನು ಖಂಡಿಸಿ, ಅವುಗಳೆಲ್ಲ ತಪ್ಪೆಂದು ಸಾಬೀತು ಪಡಿಸಿ". ನಮ್ಮ ಬುಧ್ಧಿ ಜೀವಿ ಮಿತ್ರರೊಬ್ಬರು ಬುಧ್ಧಿವಂತಿಕೆಯ ಉತ್ತರ ನೀಡಿದರು,- " ಇಲ್ಲ, ಭೈರಪ್ಪನವರನ್ನೇ ಬಯ್ಯುತ್ತೇವೆ. ಏಕೆಂದರೆ ಅವರ ಕೃತಿಯಲ್ಲಿರುವ ವಿಚಾರಧಾರೆಗಳೆಲ್ಲ ಅವರವೇ, ಅವರು ಪ್ರತಿಯೊಂದನ್ನೂ ಲೆಕ್ಕಾಚಾರ ಹಾಕಿಯೇ ಬರೆಯುತ್ತಾರೆ. ಅವರ ಕಾದಂಬರಿಯಲ್ಲಿಯ ಪಾತ್ರಗಳು ಭೈರಪ್ಪ ಏನು ಹೇಳಬೇಕೆಂದಿರುವರೋ ಅದನ್ನೇ ಹೇಳುತ್ತವೆ. ಅವರ ಕೃತಿಯನ್ನೂ ಅವರನ್ನೂ ಬೇರೆ ಬೇರೆ ಇಟ್ಟು ನೋಡಲು ಸಾಧ್ಯವಿಲ್ಲ" . ಹಿಂದೊಮ್ಮೆ, 'ಪೀಠಾ'ಸೀನರಾದ ಲೇಖಕರೊಬ್ಬರ ಮದಿರೆ ಹಾಗೂ ಮಾನಿನಿ ಪ್ರೇಮದ ಬಗ್ಗೆ ಕೇಳಿದಾಗ ಇದೇ ಬುಧ್ಧಿಜೀವಿ ಮಿತ್ರರು " ಲೇಖಕನೊಬ್ಬನ ಬರಹ ಹಾಗೂ ಬದುಕು ಒಂದೇ ಇರಬೇಕೆಂದಿಲ್ಲ" ಎನ್ನುವ ಉತ್ತರ ನೀಡಿದ್ದರು.

ಅದು ಹೋಗಲಿ ಬಿಡಿ. ಈ ಲೇಖನದ ಉದ್ದೇಶ ಭೈರಪ್ಪನವರನ್ನು ತೆಗಳುವದಾಗಲೀ, ಹೊಗಳುವದಾಗಲೀ ಅಲ್ಲ. ತೆಗಳಿದರೆ ಅಗ್ಗದ ಪ್ರಚಾರಾಭಿಲಾಷಿ ಎಂದೂ , ಹೊಗಳಿದರೆ ಮನುವಾದಿ ಎಂದೂ ಹಣೆ ಪಟ್ಟಿ ಸಿಗುವ ಸಾಧ್ಯತೆಗಳಿವೆ. ಈ ವಿಷಯದ ಬಗ್ಗೆ ಎಲ್ಲ ಮಾಧ್ಯಮಗಳಲ್ಲಿ ಮತ್ತೆ ಮತ್ತೆ ಲೇಖನ/ಚರ್ಚೆಗಳನ್ನು ಓದಿದ ಕೇಳಿದ ವಿಸ್ಮಯದ ಪ್ರಜೆಗಳಿಗೆ ಅದೇ ಚರ್ವಿತ ಚರ್ವಣದಲ್ಲಿ ಆಸಕ್ತಿ ಇರಲಿಕ್ಕೆ ಸಾಧ್ಯವಿಲ್ಲ. ನಾನಿಲ್ಲಿ ಕೇಳಬೇಕೆಂದಿರುವ ಪ್ರಶ್ನೆ : ' ಭೈರಪ್ಪನವರ ಯಾವ್ಯಾವ ಕಾದಂಬರಿಗಳನ್ನು ನೀವು ಓದಿದ್ದೀರಿ?'

*********************
ಸುರಿಯುವ ಮಳೆಯಲ್ಲೇ ಹಿಂಡುಗಟ್ಟಲೆ ಹೆಂಗಸರು ಸಭಾಭವನದೊಳಕ್ಕೆ ನುಗ್ಗುತ್ತಾರೆ, "ಯಾರಿವರು?" ಧರ್ಮಜನ ಪ್ರಶ್ನೆಗೆ ಒಬ್ಬ ಮುದುಕಿ ಕೂಗಿ ಹೇಳುತ್ತಾಳೆ: "ಸೈನಿಕರ ರಂಜನೆಗೆಂದು ಯುಧ್ಧಕ್ಕೆ ಎಳೆದೊಯ್ದಿದ್ದ ಹಳ್ಳಿಯ ಹೆಂಗಸರು. ಯುಧ್ಧದಲ್ಲಿ ಇವರೆಲ್ಲ ಬಸುರಾಗಿದ್ದಾರೆ. ಗಂಡಂದಿರು ಮನೆಗೆ ಸೇರಿಸುತ್ತಿಲ್ಲ, ಇವರ ದಿಕ್ಕೇನು? " ಧರ್ಮಜ ಮೂಕನಾಗಿ ನೋಡುತ್ತಾನೆ. ಹಿಂಡು ಹಿಂಡುಗಟ್ಟಲೆ ಮಳೆಯಲ್ಲಿ ನಡುಗುತ್ತಾ ಒಳಗೆ ಜಾಗ ಸಾಲದೇ ಹೊರಗೇ ನಿಂತಿರುವ ಓ ಲೆಕ್ಕ ಸಿಗದಷ್ಟು ಜನ..." ಮಹಾರಾಜಾ, ನಿಮ್ಮ ವಂಶದ ಯುಧ್ಧದಲ್ಲಿ ನಾವೆಲ್ಲಾ ಹಿಂಸೆಯ ಬಸುರಾಗಿದ್ದೇವೆ, ಹುಟ್ಟುವ ಮಕ್ಕಳಿಗೆ ತಂದೆ ಎಂದು ಯಾರ ಹೆಸರು ಹೇಳಬೇಕು?" ಒಬ್ಬ ಹೆಂಗಸು ತಗಾದೆ ಮಾಡುವ ಗಟ್ಟಿ ದನಿಯಲ್ಲಿ ಕೂಗುತ್ತಾಳೆ.
**********************
ಮೇಲಿನದು "ಪರ್ವ"ದ ಕೊನೆ ಅಧ್ಯಾಯದ ಕೆಲ ಸಾಲುಗಳು.

ಸತ್ಯವತಿಯ ಎದುರು ನಿಂತು ಪ್ರತಿಜ್ನೆಗೈದ ಭೀಷ್ಮ ಎನ್ನುವ ಹುಡುಗ ಶಿಖಂಡಿಯ ಎದುರಲ್ಲಿ ಬಿಲ್ಲು ಬಾಣ ಹಿಡಿದು ಯುಧ್ಧಕ್ಕೆ ನಿಲ್ಲುವ ಸಮಯದಲ್ಲಿ ಎಷ್ಟು ಸಂವತ್ಸರಗಳನ್ನು ಕಳೆದಿದ್ದಿರಬಹುದು ಎಂಬುದನ್ನು ನೀವೆಂದಾದರೂ ಕಲ್ಪಿಸಿಕೊಂದಿದ್ದೀರಾ? ಊಹೂಂ ........ಎಂದೋ ನೋಡಿದ ಯಕ್ಷಗಾನ, ಎಲ್ಲೋ ನೋಡಿದ ಚಿತ್ರಪಟ , ಕೊನೆಯಲ್ಲಿ ಬಿ.ಆರ್.ಚೋಪ್ರಾನ ಟಿವಿ ಮಹಾಭಾರತದಲ್ಲಿನ ಭೀಷ್ಮನ ವೇಷದ ಅಳತೆಯನ್ನು ಮೀರಲಾರದಲ್ಲವೇ ನಮ್ಮ ಕಲ್ಪನೆ ? ಬುಡದಿಂದ ಲೆಕ್ಕ ಹಾಕಿ ನೋಡಿ, ಭೀಷ್ಮನಿಗೆ ಸಾಯುವಾಗ 300 ರಿಂದ 350 ವರ್ಷಗಳಾದರೂ ಆಗಿದ್ದಿರಬೇಕಲ್ಲ? ಆ ಮುದಿ ಜೀವ ರಣರಂಗದ ಹತ್ತಿರವೆಲ್ಲೋ ಬಾಣಗಳ ಮಂಚದ ಮೇಲೆ ಅಸಹಾಯಕನಾಗಿ ಮಲಗಿದ್ದರೆ, ರಣಹದ್ದು ಗಿಡುಗಗಳು ತೊಂದರೆ ಕೊಟ್ಟಿರಲಾರವೇ?

ಪಾಂಡು ಸತ್ತದ್ದು ಹೇಗೆ.....ಪಾಂಡವರು ಹುಟ್ಟಿದ್ದು ಹೀಗೆ........ಧೃತರಾಷ್ಟ್ರನಿಗೆ ನೂರು ಮಕ್ಕಳು, ಕೃಷ್ಣನಿಗೆ ಹದಿನಾರು ಸಾವಿರ ಹೆಂಡಂದಿರು...ಅವರು ಅವರೆಲ್ಲರ ಹೆಸರು ನೆನಪಿಟ್ಟಿದ್ದಾದರೂ ಹೇಗೆ......ಹಿಡಂಬಿಗೂ, ದ್ರೌಪತಿಗೂ ಭೀಮನಮೇಲೇಕೆ ಪ್ರೀತಿ....ಬಲರಾಮನಿಗೇಕೆ ಆತನ ಹಲ್ಲು ನೋವಿನ ಭೀತಿ...... ಗಾಂಧಾರಿಯ ಕಣ್ಣು ಪಟ್ಟಿಯ ಕಥೆ......ಕುಂತಿ ಕರ್ಣರ ವ್ಯಥೆ.......

'ಪರ್ವ'ವೆಂಬ ಮಹೋನ್ನತ ಕೃತಿ ಒಂದು ಮಹಾ ತಪಸ್ಸಿನ ಫಲವಾಗಿರಲು ಮಾತ್ರ ಸಾಧ್ಯ. ಆ ತಪಸ್ಸಾಧನೆಗೆ ಭೈರಪ್ಪನವರು ತೆಗೆದುಕೊಂಡಿದ್ದು ಬರೋಬ್ಬರಿ ಒಂದು ವರ್ಷ ಎರಡು ತಿಂಗಳು.

ಪರ್ವವನ್ನು ವರ್ಣಿಸಲು ಶಬ್ದಗಳ ಕೊರತೆ. ಮೊದಲನೇ ಬಾರಿ ಓದಿದಾಗ ದಿಗ್ಮೂಢನನ್ನಾಗಿಸುವ, ಎರಡನೇ ಬಾರಿ ಓದಿದಾಗ ಚಿಂತನೆಗೆ ನೂಕಿಬಿಡುವ , ಮೂರನೇ ಬಾರಿ ಓದಿದಾಗ ಹೊಸ ಭಾವ ನೀಡುವ ...ಅದನ್ನು ಓದಿಯೇ ಅನುಭವಿಸಬೇಕು. ಅನಂತ ಮೂರ್ತಿಯವರು ಹೇಳಿದ್ದರು- " ಪರ್ವದಲ್ಲಿ ಪುರಾಣ ಇತಿಹಾಸವಾಗಿದೆ !"

ಹೌದಲ್ಲ!!

ನೀವಿನ್ನೂ ಓದಿರದಿದ್ದರೆ ಅದು ನೀವು ಕಲಿತ ಅಕ್ಷರಕ್ಕೇ ಅವಮಾನ. ಭೈರಪ್ಪನವರನ್ನು ಬಿಡಿ, ಅವರ ಹೆಸರೇ ......