Skip to main content

ಓ ಅಮ್ಮಾ....!

ಬರೆದಿದ್ದುMarch 1, 2012
2ಅನಿಸಿಕೆಗಳು

ಮುಪ್ಪು ಆವರಿಸಿ ದೇಹದ ಶಕ್ತಿ ಕಳೆದುಹೋಗಿ
ಮೈಯ್ಯ ಚರ್ಮ ಸುಕ್ಕಾಗಿ ಕಣ್ಗಳು ಮಂಜಾಗಿ
ಹಲ್ಲು ಹೋಗಿ ಬೆನ್ನು ಬಾಗಿ ಕುಳಿತಲ್ಲಿ ಕುಳಿತವಳಾಗಿ
ಮಲಗಿದರೆ ಮಗ್ಗುಲು ಬದಲಿಸಲೂ ಬಲು ಕಷ್ಟವಾಗಿ
ಮತ್ತೆ ಮಗುವಿನ ಹಾಗೆ ತನ್ನವರ ಸಹಾಯ ಬೇಕಾಗಿ
ನಿನ್ನ ನೀನೆ ಶಪಿಸಿದ್ದೆ ನಿನ್ನಾ ಸ್ಥಿತಿಗಾಗಿ
ಬೇರೆಯವರಿಗೆ ಭಾರವಾಗಬಾರದು ಎಂದು
ಆಶಿಸಿದೆ ಈ ಭೂಮಿಯ ಮೇಲೆ ಇರಬಾರದೆಂದು.
 
ಆದರೆ ಓ ಅಮ್ಮಾ.....!
 ನಿನ ಕರುಳ ಬಳ್ಳಿಯ ನಾಳದಿ ಹರಿದ ಹನಿ ಹನಿ ನೆತ್ತರ
ಮಾಂಸದ ತುಣುಕುಗಳ ಕಣ ಕಣವ ಎನಗೆ ಉಣಿಸಿಲ್ಲವೇ...?
ಕ್ಷಣ ಕ್ಷಣವು ಬೆಳೆವಂತೆ ಉದರದೊಳು ನನ ಪೋಷಿಸಿ
ಒಂಬತ್ತು ತಿಂಗಳು ಹೊತ್ತು ಎಲ್ಲ ನೋವ ಸಹಿಸಿಲ್ಲವೇ...?
 
ಹೆತ್ತು  ಈ ಧರೆಗಿಳಿಸಿ ನನ ಹೊತ್ತು ಸಾಕು ಸಲಹಿದೆ
ನಿನಗಿಲ್ಲದಿದ್ದರೂ ನನಗೇನೂ ಕೊರತೆ ಮಾಡದೆ
ಬಿದ್ದು ಒದ್ದಾಡಿ ಎದ್ದು ಓಡಾಡಿ ನನ ನಡೆವಂತೆ ಮಾಡಿದೆ
ಸಾಕಿ ಸಲಹಿ ಓದು ಬರಹ ಕಲಿಸಿ ದೊಡ್ದವನಾಗಿ ಮಾಡಿದೆ
ನಿನ್ನಿಚ್ಛೆಯಂತೆ ಸಂಗಾತಿಯ ಸೇರಿ ನಾ ಸಂಸಾರಿಯಾದೆ.
 
ಈ ಎಲ್ಲ ಸಮಯದಲು ನೀ ನನ್ನೊಳಿತ ಬಯಸಲಿಲ್ಲವೇ..?
ನನ ಚಂದಕಾಗಿ ಗಂಧದಂತೆ ನಿನ ಜೀವ ತೇದು ಸವೆಸಲಿಲ್ಲವೇ..?
ಇಷ್ಟೆಲ್ಲ ಇರುವಾಗ ನಾ ನಿನಗೆ ಬೇರೆಯವ ಹೇಗಾಗುವೆ...?
ನಿನ ರಕ್ತ-ಮಾಂಸಗಳ ತುಣುಕುಗಳೆ ನಾನಲ್ಲವೇ..?
ಕಡೆಗಣಿಸೆ ಕುಡಿದಹಾಲ ಋಣವ ತೀರಿಸಿದಂತಾಗುವುದೇ..?
 
ನಿನ್ನೊಲುಮೆಯೆ ನನಗೆ ಸದಾ ದಾರಿ ದೀವಿಗೆಯಲ್ಲವೆ
ನಿನ ಸೇವೆಯೆ ಪರಮಾತ್ಮನ ಪೂಜೆಯೆಂದರಿತಿರುವೆ
ಕನಿಕರಿಸಿ ನನ ಸೇವೆಯ ಸ್ವೀಕರಿಸು ಓ ಅಮ್ಮಾ
ಹರಸು  ನೀ ಎಂದೂ ಸಾರ್ಥಕವಾಗಲಿ ನಮ ಜನ್ಮ…!

ಲೇಖಕರು

ತ್ರಿನೇತ್ರ

ನಾವಿರೋದೇ ಹೀಗೆ...!

ನಾನು ಹುಟ್ಟು ಕನ್ನಡಿಗ ಓದಿ ಬೆಳೆದಿದ್ದು ಬೆಂಗಳೂರಿನಿಂದ ಮೈಸೂರಿನವರೆಗೂ ವಿವಿಧ ಊರುಗಳಲ್ಲಿ. ವೃತ್ತಿಗಾಗಿ ಅಲೆದದ್ದು ಬೆಂಗಳೂರಿನಿಂದ ಕೊಡಗಿನವರೆಗೆ ನಂತರ ರಾಷ್ಟ್ರದ ರಾಜಧಾನಿ ದೆಹಲಿ ಹಾಗೊ ಅದರ ಸುತ್ತಲಿನ ಹರ್ಯಾಣಾ ಗಳಲ್ಲಿ ೨೧ ವರ್ಷ ಸೇವೆ ಸಲ್ಲಿಸಿ ಮತ್ತೆ ತಾಯ್ನಾಡಿನ ರಾಜಧಾನಿ ಬೆಂಗಳೂರಿಗೆ ಬಂದು ನೆಲೆಸಿರುವೆ. ಆದರೂ ಕನ್ನಡ ಮರೆತಿಲ್ಲ ಮರೆಯುವಂತಿಲ್ಲ. ಕನ್ನಡದ ಯಾವುದೇ ಲೇಖನ ಕಥೆ ಕವಿತೆ ಇತ್ಯಾದಿ ಓದುವುದು ಹಿಂದಿನ ಅಭ್ಯಾಸ. ಸಮಯ ಸಿಕ್ಕಾಗ ಏನಾದರೂ ಚಿಕ್ಕ ಪುಟ್ಟದ್ದು ಬರೆವುದು ಇತ್ತೀಚಿಗೆ ಬೆಳೆಸಿಕೊಂಡ ಹವ್ಯಾಸ ಹಾಗಾಗಿ ಈ ವಿಸ್ಮಯನಗರಿಗೆ ಪ್ರವೇಶ...!

ಅನಿಸಿಕೆಗಳು

Rajesh N C ಶನಿ, 03/03/2012 - 16:26

ನೀಮ್ಮ ಈ ಲೇಖನ ನಿಜವಾಗಿಯೂ ಅದ್ಭುತವಾದ ಕವನವಾಗಿದೆ. ನಿಮಗೆ ನನ್ನ ಸೆಲ್ಯುಟ್

ತ್ರಿನೇತ್ರ ಸೋಮ, 03/05/2012 - 17:21

ತುಂಬಾ ತುಂಬಾ ಧನ್ಯವಾದಗಳು ರಾಜೇಶ್ ಅವರೇ... ಕವನವನ್ನು ಓದಿ ತಮ್ಮ ಮೆಚ್ಚುಗೆಯ ನುಡಿಗಳನ್ನು ಬರೆದು ತಿಳಿಸಿದ್ದಕ್ಕೆ. ಸಹಕಾರ ಹೀಗೇ ಮುಂದುವರೆಯಲಿ. -ತ್ರಿನೇತ್ರ.

ಈ ಲೇಖನದ ಬಗ್ಗೆ ನಿಮ್ಮ ಅನಿಸಿಕೆ ತಿಳಿಸಿ

The content of this field is kept private and will not be shown publicly.