ಎಟಿಎಂ: ಇಂದಿನಿಂದ ನಿಯಮ ಬದಲು

ನವದೆಹಲಿ (ಪಿಟಿಐ):   ಬ್ಯಾಂಕ್‌ಗಳ `ಎಟಿಎಂ` ಬಳಸುವ ಗ್ರಾಹಕರಿಗೆ ಶುಕ್ರವಾರದಿಂದ ಹೊಸ ನಿಯಮಗಳು ಅನ್ವಯವಾಗಲಿವೆ.

ಭಾರತೀಯ ರಿಸರ್ವ್ ಬ್ಯಾಂಕ್ ಹೊರಡಿಸಿದ ಆದೇಶದ ಅನ್ವಯ, `ಎಟಿಎಂ` ವಹಿವಾಟಿಗೆ ಸಂಬಂಧಿಸಿದಂತೆ ಹೊಸ ನಿಯಮಗಳು ಜುಲೈ 1ರಿಂದ ಜಾರಿಗೆ ಬರಲಿವೆ.

`ಎಟಿಎಂ`ಗಳಿಂದ ಹಣ ಪಡೆಯುವಾಗ ಯಾಂತ್ರಿಕ ದೋಷದಿಂದ ನಗದು ಗ್ರಾಹಕರ ಕೈಸೇರದೇ ಖಾತೆಯಲ್ಲಿ ಹಣ ಕಡಿತಗೊಂಡ ಪ್ರಕರಣಗಳಲ್ಲಿ ಇನ್ನು ಮುಂದೆ 7 ಕೆಲಸದ ದಿನಗಳಲ್ಲಿ ನಿರ್ದಿಷ್ಟ ಮೊತ್ತವು ಗ್ರಾಹಕರ ಖಾತೆಗೆ ಸೇರ್ಪಡೆಯಾಗಲಿದೆ.

ಗ್ರಾಹಕರು ದೂರು ನೀಡಿದ ನಂತರ 7 ಕೆಲಸದ ದಿನಗಳಲ್ಲಿ ಅವರ ಖಾತೆಗೆ ಸಂಬಂಧಿಸಿದ ಬ್ಯಾಂಕ್‌ಗಳು  ಹಣ ಸಂದಾಯ ಮಾಡಬೇಕು ಎಂದು ಕೇಂದ್ರೀಯ ಬ್ಯಾಂಕ್ ಸೂಚಿಸಿದೆ. ಇಲ್ಲಿಯವರೆಗೆ ಇದಕ್ಕೆ 12 ದಿನಗಳನ್ನು ನಿಗದಿ ಮಾಡಲಾಗಿತ್ತು.

`ಆರ್‌ಬಿಐ` ಮಾರ್ಗದರ್ಶಿ ಸೂತ್ರಗಳ ಅನ್ವಯ, 7 ಕೆಲಸದ ದಿನಗಳ ನಂತರವೂ ಖಾತೆಗೆ ಹಣ ಪಾವತಿ ಮಾಡದಿದ್ದರೆ ಬ್ಯಾಂಕ್‌ಗಳು ಪ್ರತಿ ದಿನಕ್ಕೆ ರೂ100ರಂತೆ ದಂಡ ಪಾವತಿಸಬೇಕಾಗುತ್ತದೆ. ತೊಂದರೆಗೆ ಗುರಿಯಾದ ಗ್ರಾಹಕರು 30 ದಿನಗಳಲ್ಲಿ ದೂರು ಸಲ್ಲಿಸಿರಬೇಕಾಗುತ್ತದೆ.

ಗ್ರಾಹಕರು ತಮ್ಮ ಖಾತೆ ಇರದ ಇತರ ಬ್ಯಾಂಕ್‌ಗಳ `ಎಟಿಎಂ` ಮೂಲಕ ಹಣ ಪಡೆಯುವುದರ  ಮೇಲೆ ಸದ್ಯಕ್ಕೆ ಗರಿಷ್ಠ 5 ಬಾರಿಯ ಮಿತಿ ವಿಧಿಸಲಾಗಿದೆ. ಹಣಕಾಸೇತರ ವಹಿವಾಟುಗಳಾದ ಖಾತೆಯ ಶಿಲ್ಕು ತಿಳಿದುಕೊಳ್ಳುವ, ರಹಸ್ಯ ಸಂಖ್ಯೆ (ಪಿನ್) ಬದಲಿಸುವ ಮತ್ತು ಖಾತೆಯಲ್ಲಿ ಇರುವ ಹಣ ಮತ್ತು ವಹಿವಾಟಿನ ಚಿಕ್ಕ ಮುದ್ರಿತ ಹೇಳಿಕೆ ಪಡೆಯುವುದರ ಮೇಲೆ ಇದುವರೆಗೆ ಯಾವುದೇ ನಿರ್ಬಂಧ ಇರಲಿಲ್ಲ. ಈ ಪದ್ಧತಿಯೂ ಶುಕ್ರವಾರದಿಂದ ಬದಲಾಗಲಿದೆ. 

ಹೊಸದಾಗಿ ಜಾರಿಗೆ ಬರುವ ಹೊಸ ನಿಯಮಗಳ ಬಗ್ಗೆ ಬ್ಯಾಂಕ್‌ಗಳು ತಮ್ಮ ಗ್ರಾಹಕರಿಗೆ ಮಾಹಿತಿಯನ್ನೂ ನೀಡಲಿವೆ. ಅನ್ಯ ಬ್ಯಾಂಕ್‌ಗಳ `ಎಟಿಎಂ`ಗಳ  5 ಉಚಿತ ಬಳಕೆಗೆ ಅವಕಾಶ ಮುಂದುವರೆಸಿರುವ ಆರ್‌ಬಿಐ, ಗರಿಷ್ಠ  5 ಬಾರಿಯ ಬಳಕೆಯಲ್ಲಿ ನಗದು ಮತ್ತು ನಗದೇತರ ವಹಿವಾಟುಗಳನ್ನೂ ಈಗ ಹೊಸದಾಗಿ ಸೇರ್ಪಡೆ ಮಾಡಿದೆ. 

ಅಂದರೆ, ಇನ್ನು ಮುಂದೆ ಗ್ರಾಹಕರು ತಮ್ಮ ಖಾತೆ ಇರದ ಇತರ ಬ್ಯಾಂಕ್‌ಗಳ `ಎಟಿಎಂ`ಗಳನ್ನು ಹಣ ಪಡೆಯಲು, ಶಿಲ್ಕು ವಿವರ ಪಡೆಯಲು, ಚಿಕ್ಕ ಮುದ್ರಿತ ವಹಿವಾಟು ವಿವರ ಪಡೆಯಲು ಪ್ರತಿ ತಿಂಗಳು 5 ಬಾರಿ ಮಾತ್ರ ಉಚಿತವಾಗಿ ಬಳಸಬಹುದು.  ಈ ಉಚಿತ ಸೇವೆಗಳು ಬರೀ ಉಳಿತಾಯ ಖಾತೆದಾರರಿಗೆ ಮಾತ್ರ ಲಭಿಸಲಿವೆ ಎನ್ನುವ ನಿಬಂಧನೆಯನ್ನೂ ವಿಧಿಸಲಾಗಿದೆ.  5 ಉಚಿತ ಅವಕಾಶ ನಂತರದ ಪ್ರತಿಯೊಂದು ವಹಿವಾಟಿಗೆ ಬ್ಯಾಂಕ್‌ಗಳು  ಶುಲ್ಕ ವಿಧಿಸಬಹುದಾಗಿದೆ. 5 ವಹಿವಾಟು ನಂತರದ ಪ್ರತಿಯೊಂದು ನಗದು ವಹಿವಾಟಿಗೆ ರೂ20ರಂತೆ ಮತ್ತು ನಗದೇತರ ವಹಿವಾಟಿಗೆ ರೂ 8.50ರಂತೆ ಶುಲ್ಕ ವಿಧಿಸುವುದಾಗಿ ಎಚ್‌ಡಿಎಫ್‌ಸಿ ಬ್ಯಾಂಕ್ ಪ್ರಕಟಿಸಿದೆ. ಇತರ ಬ್ಯಾಂಕ್‌ಗಳೂ ಇದೇ ಧೋರಣೆ ಅನುಸರಿಸುವ ಸಾಧ್ಯತೆಗಳು ಇವೆ.

ಎಸ್‌ಎಂಎಸ್, ಇ-ಮೇಲ್ ಮಾಹಿತಿ: ವಂಚನೆ ತಡೆಗಟ್ಟಲು ಬ್ಯಾಂಕ್‌ನ ಪ್ರತಿಯೊಂದು ವಹಿವಾಟಿನ ಬಗ್ಗೆ ಬ್ಯಾಂಕ್‌ಗಳು ತಮ್ಮ ಗ್ರಾಹಕರಿಗೆ ಎಸ್‌ಎಂಎಸ್ ಮತ್ತು ಇ-ಮೇಲ್ ಮಾಹಿತಿ ರವಾನಿಸಬೇಕಾಗುತ್ತದೆ. ಸದ್ಯಕ್ಕೆ ನಿರ್ದಿಷ್ಟ ಮೊತ್ತ ಮತ್ತು ಆಯ್ದ ವಹಿವಾಟಿಗಷ್ಟೇ ಬ್ಯಾಂಕ್‌ಗಳು ಮಾಹಿತಿ ರವಾನಿಸುತ್ತಿವೆ.